ҚР Білім және ғылым министрлігінің Фитохимия институты Қарағанды қаласында Қазақстан Республикасының Президенті Н.Ә. Назарбаевтың жеке қамқорлығымен Қазақстан Республикасы Министрлер Кабинетінің 1995 жылғы 7 сәуірдегі №430 Қаулысына сәйкес құрылды.
   2005 жылы Мемлекет басшысының жеке тапсырмасы бойынша ҚР Үкіметінің 2005 жылғы 27 қыркүйектегі №953 Қаулысына сәйкес «Фитохимия» ғылыми-өндірістік орталығы» АҚ болып қайта құрылды.

ҚР Президенті Н.Ә. Назарбаевтың 2009 жылғы 15 қаңтардағы №41-8.24 тапсырмасын орындау мақсатында, ҚР Үкіметінің 2008 жылғы 3 шілдедегі №668 Қаулысына және ҚР Қаржы министрлігі Мемлекеттік мүлік және жекешелендіру комитетінің 2009 жылғы 24 наурыздағы №139 бұйрығына сәйкес «Фитохимия» ҒӨО» АҚ «Фитохимия» халықаралық ғылыми-өндірістік холдингі» АҚ болып қайта құрылды. Бұл химия-фармацевтикалық және фармакологиялық зерттеу жобаларын орындауға шетелдік компанияларды қатыстыруды және фармацевтикалық өндірісте GMP халықаралық стандарттары бойынша қызмет ететін қазақстандық мамандарды дайындауды көздейді.

«Фитохимия» холдингі ҚР Үкіметінің 2006 жылғы 28 желтоқсандағы №1296 Қаулысымен бекітілген республикалық фармацевтикалық кластердің негізгі кәсіпорны болып табылады. Ол Қарағанды фармацевтикалық зауыты шығаратын фармацевтикалық өнімнің қосылған құнын қалыптастыруға қатысатын 30 кәсіпорынды біріктіреді. Сондай-ақ, «Фитохимия» холдингі отандық фармацевтика саласының дамуын ғылыми-техникалық сүйемелдеуді қамтамасыз ететін кластер құрушы кәсіпорын болып табылады.
Холдинг биологиялық белсенді заттарды іздеу, дәрілік шикізатты өсіру мен оны қайта өңдеуден бастап, жаңа фитопрепараттар дәрілік түрлерінің тәжірибелік-өнеркәсіптік партияларын өндіруге дейінгі бірегей отандық фитопрепараттардың кешенді өндірісін жүзеге асырады.
«ФИТОХИМИЯ» ХОЛДИНГІНІҢ МАҚСАТЫ
«Фитохимия» холдингінің негізінде GMP халықаралық стандарттарына сәйкес бірегей дәрілік заттардың өндірісін дамыту;
озық ғылыми-техникалық зерттеулер, оларды фармацевтикалық өндіріске енгізу және коммерцияландыру жөніндегі ғылымды қажетсінетін жобаларды іске асыру.
«ФИТОХИМИЯ» ХОЛДИНГІНІҢ ДАМУ СТРАТЕГИЯСЫ
Холдингтің стратегиясы мемлекеттің стратегиялық құжаттары мен салалық бағдарламаларында мазмұндалған ғылыми зерттеулер саласындағы мемлекеттік саясат міндеттерін іске асыруға бағытталған.

1.  заманауи отандық және шетелдік технологияларды отандық фармацевтикалық өнеркәсіптің дамуына енгізуді, соның ішінде жеке инвестицияларды тарту мен мемлекеттік-жекешелік әріптестік құралдарын қолдануды қамтамасыз ететін серпінді жобаларды жасау және іске асыру;
2.  химия, фармация және дәрілік заттар технологиясы саласындағы іргелі және қолданбалы зерттеу бағдарламаларын іске асыру, халықаралық стандарттар талаптарына сәйкес келетін дәрілік препараттардың өндірісі бойынша ғылымды қажетсінетін технологияларды жасау және оларды өндіріске енгізу;
3.  қолдағы ғылыми-технологиялық зерттемелерді коммерцияландыру, оларды нарыққа шығару; мемлекеттік және жеке ресурстарды кооперациялаудың, сондай-ақ, мемлекеттік ғылыми гранттарды дәрі технологиясын GMP халықаралық стандарттары бойынша жетілдіруге, жаңа тиімді дәрілік препараттарды жасауға, олардың өндірісін ұйымдастыруға, маркетингке және қазақстандық фармацевтикалық өнімді нарыққа шығаруға бағдарлаудың есебінен ғылыми зерттеулерді қаржыландыру үлесін тәжірибелік-конструкторлық зерттеулер кезеңінде ұлғайту; бірегей дәрілік препараттарды әлемдік нарыққа шығару үшін халықаралық стандарттар талаптарына сәйкес олардың рандомизацияланған, көп орталықты клиникалық сынақтарын жүргізу;
4.  ғылым мен технологияларды орта және ұзақ мерзімді келешекте ғылыми-технологиялық дамыту, ғылыми-зерттеу қызметін мемлекеттік реттеу, соның ішінде ғылыми зерттеулер мен фармацевтикалық өнеркәсіп зерттемелерін мемлекеттік ынталандыру шаралары бойынша ұсыныстар жасау;
отандық фармацевтикалық өнеркәсіпті дамытуға қатысатын мамандарға арналған ұлттық білім беру және тренинг бағдарламаларын жасау, «Химия», «Фармацевтикалық өндіріс технологиясы», «Органикалық заттардың химиялық технологиясы», «Фармация» мамандықтары бойынша магистратура мен докторантура (PhD) арқылы білікті кадрларды даярлау, фармацевтикалық өндіріс пен фармацевтика ғылымына қатысатын мамандарды тиісті халықаралық өндірістік, зертханалық және клиникалық практикаға (GMP, GLP, GСP) оқытуды ұйымдастыру;
6.  зияткерлік меншікті (патенттерді, «ноу-хау», тауар белгілерін) пайдалану арқылы отандық фармацевтикалық өндірісті дамытуға инвестицияларды тарту.
«Фитохимия» халықаралық ғылыми-өндірістік холдингі» АҚ(бұдан әрі – «Фитохимия» холдингі) құрамына химиялық, фармакологиялық, биологиялық және фармацевтикалық бағыттағы 11 ғылыми-зерттеу бөлімше кіретін жетекші ғылыми-өндірістік кешен болып табылады және ҚР Үкіметінің 2011 жылғы 14 желтоқсандағы №1530-29с Қаулысына сәйкес елдің стратегиялық нысандары қатарына жатады.
«Фитохимия» холдингінде іргелі зерттеулерден, соның ішінде қолданбалы зерттемелерден бастап, өндіріске ғылымды қажетсінетін технологияларды енгізуге дейінгі толассыз ғылыми-техникалық зерттеулер қағидасы жүзеге асырылады. Сондай-ақ, өндіріске қазақстандық мазмұны жоғары, бәсекеге қабілетті фармацевтикалық өнімнің ғылымды қажетсінетін зерттемелерін енгізуге мүмкіндік берген іргелі және қолданбалы сипаттағы елеулі табыстарға қол жеткізілді.
Бір сөзбен айтқанда, «Фитохимия» холдингі биологиялық белсенді заттарды іздеу, дәрілік шикізатты өсіру мен оны қайта өңдеуден бастап, жаңа препараттар дәрілік түрлерінің тәжірибелік-өнеркәсіптік партияларын өндіруге дейінгі бірегей отандық фитопрепараттардың кешенді өндірісін жүзеге асырады.
«Фитохимия» холдингінің мемлекеттік лицензиялары
·      ғылыми және ғылыми-зерттеу қызметін жүзеге асыру құқығына (2016 жылғы 3 тамыздағы МК №004791 аккредиттеу туралы куәлік);
·      магистратура, PhD докторантура нысанында жоғары оқу орнынан кейінгі кәсіби білім беру құқығына (2010 жылғы 30 маусымдағы АБ №0137338);
өнеркәсіптік өндіріс жағдайларында дәрілік заттарды жасау жөніндегі фармацевтикалық қызметке (2010 жылғы 4 ақпандағы №ФД65000018 КМПЦФ).